អត្ថបទប្រាង្គប្រាសាទ

• ប្រាសាទអង្គរវត្ត:

ប្រាសាទអង្គរវត្ត មានទីតាំងស្ថិតនៅភាគខាងជើងក្រុងសៀមរាបក្នុងស្រុកសៀមរាបមានចំងាយ ៧ គ.ម ពីទីរួមខេត្ត តាមផ្លូវកូម៉ៃ ឬ ផ្លូវសាល់ដឺហ្គោល។ ប្រាសាទនេះសាងសង់នៅដើមសតវត្សទី ១២ ដោយព្រះបាទ សូរ្យវ័ន្មទី២ (១១១៣-១១៥០) ដើម្បីឧទ្ទិសថ្វាយព្រះវិស្ណុ ក្នុងព្រហ្មមញ្ញាសាសនា។ ប្រាសាទនេះមានលក្ខណល្អវិចិត្ត និង​ បង្ហាញនូវសិល្ប:ខ្មែរដ៍អស្ចារ្យដល់កំពូល។
ប្រជាជនខ្មែរមួយចំនួនសន្មត់ថា ប្រាសាទអង្គរវត្តត្រូវបានសាងសង់ដោយព្រះវិស្ណុការ ហើយមានអ្នកប្រាជ្ញាជាច្រើនបានពិភាក្សាគ្នាថាតើប្រាសាទអង្គរវត្តត្រូវបានសាងសង់ជាប្រាសាទ ឬ ជាផ្លូវ។
បើតាមលោក ហ្សែសឺដែស ប្រាសាទអង្គរវត្តគឺតំណាងអោយពិភពលោក។ បា្រង្គកណ្តាលតំណាងអោយភ្នំព្រះសុមេរុដែលស្ថិតនៅកណ្តាលពិភពលោក។ ប្រាង្គទាំងប្រាំតំណាងអោយកំពូលភ្នំព្រះសុមេរុដែលជាជាយផែនដី និង គូទឹកជុំវិញគឺជាសមុទ្រដែលព័ទ្ធជុំវិញ។
ប្រាសាទអង្គរវត្តមានឈ្មោះដើមថា " ប្រាសាទបរមវិស្ណុលោក "។ ប៉ុន្តែ ការវិវត្តន៍នៃឈ្មោះអង្គរវត្ត អាចត្រូវបានគេយកតាមប្រវត្តិសាស្ត្រ។ ស្លាកស្នាមដំបូងគឺ មាននៅសតវត្សរ៍ទី១៦។ ជាការពិតណាស់ប្រាសាទនេះបានក្លាយទៅជាកន្លែងពុទ្ធសាសនាដ៍ល្បីល្បាញមួយ។ តាមសិលាចារិកនៅក្នុងសតវត្សរ៍ទី ១៦ ឈ្មោះនៃប្រាសាទអង្គរវត្តគឺ " ព្រះមហានគរឥន្ទ្រប្រត្ថព្រះពិស្ណុលោក " ហើយមួយទៀតនៅ សតវត្សរ៍ទី ១៧​ ហៅថា " ឥន្ទបត្ថម្ភានគរ ស្រីសុធរពិស្ណុលោក " ។ ចំណែកឈ្មោះអង្គរវត្តគឺជាឈ្មោះសាមញ្ញសំរាប់កំណត់បុជនីដ្ឋាននេះ។ ចំពោះប្រជាជនខ្មែរ ពិសេសអ្នកសៀមរាបច្រើនហៅថា " អង្គរតូច "។ ទោះបីយ៉ាងណាក៏ដោយអ្នកនិពន្ធអឺរ៉ុបទាំងអស់កំណត់ហៅឈ្មោះរួមមួយគឺ អង្គរវត្ត។​ ប៉ុន្តែ ឈ្មោះរបស់អង្គរវត្តដែលហៅនៅសម័យកណ្តាលគឺមិនទាន់រលត់ទេ គឺនៅមានគេស្គាល់នៅឡើយ។